Заменик министерката за животна средина и просторно планирање Ане Лашкоска учествуваше на четвртиот состанок на Управниот одбор за проектот „Одржливи услуги за управување со комунален отпад“, што го имплементира Шведската асоцијација на локални власти и региони -САЛАР и Шведската агенција за меѓународен развој (Сида).
Средбата, на која присуствуваа претставници од Министерството за животна средина и просторно планирање, градоначалникот на општина Прилеп, Борче Јовчески, градоначалникот на општина Новаци, Стевчо Стевковски, извршниот директор на Здружението на единиците на локалната самоуправа ЗЕЛС, Душица Перишиќ и државниот секретар при Министерството за локална самоуправа, беше организирана со цел да се разгледаат состојбите и капацитетите на општините опфатени со овој проект, да се претстават реализираните активности и да се дефинираат следните чекори во воспоставување на интегриран самоодржлив регионален систем за управување со отпад.
Според заменик министерката Лашкоска, истражувањето на сите достапни извори за финансирање на скапите инвестиции во управувањето со отпадот останува еден од главните приоритетите на највисоките владини органи.
- Дозволете ми да појаснам дека во ниеден момент не зборуваме за преземање на надлежностите и овластувањата на општините, туку едноставно за приклучување на централната власт да заедно со локалната власт го реши овој долгогодишен проблем во нашата држава – рече Лашкоска.
Таа појасни и дека како главна задача на Министерството за животна средина и просторно планирање е подобрувањето на постоечките закони и усогласувањето со новите директиви на ЕУ кои ја регулираат оваа област, како и спроведување на овие регулативи.
- Со националната регулатива ќе овозможиме воспоставување на единствен функционален систем за регулирање на обврските кои треба да ги исполнуваат сите засегнати страни. Освен тоа, успешната имплементација на овој регионален пристап за управување со отпад ќе послужи како пример и поттик за другите региони во земјата да ги надминат своите сомнежи и да почнат да веруваат дека ваквото управување со отпад е вистинското и моментално најдобро решение
– додаде Лашкоска.
