Zëvendëskryeministri i parë dhe ministri i Mjedisit Jetësor dhe Planifikimit Hapësinor Izet Mexhiti ka takuar edhe ambasadoren e Greqisë në Maqedoninë e Veriut, E.S Sofia Filipidu.
Fokusi i bisedimeve ishte mbrojtja e mjedisit dhe bashkëpunimi ndërkufitar, gjëra që janë thelbësore për zhvillimin e qëndrueshëm të rajonit.
U diskutua Marrëveshja e Parkut të Prespës, e nënshkruar në vitin 2010 dhe e ratifikuar në vitin 2019, e cila krijoi struktura të rëndësishme për menaxhimin e parkut, me qëndrimin e përbashkët se është e nevojshme të forcohen këto struktura dhe të sigurohen burimet e nevojshme për përmbushjen e këtyre qëllimeve.
Gjithashtu, gjatë takimit u diskutua për të arriturat e deritanishme, sfidat dhe mënyrat e përmirësimit të bashkëpunimit për mbrojtjen e biodiversitetit unik të Parkut të Prespës, Liqenit të Dojranit dhe projekteve në infrastrukturën energjetike. U propozuan zgjidhje të përbashkëta për menaxhimin e burimeve ujore dhe reduktimin e ndotjes ndërkufitare.