Shkup, 04.04.2025 Drejtoresha e Inspektoratit Shtetëror të Mjedisit, Ivana Ginovska, sot mbajti konferencë për media lidhur me ngjarjet në minierën e Toranicës, në të cilën raportoi se çështja është trajtuar me shumë seriozitet, edhe pse sipas saj, persona të caktuar kanë dalë me informata të pasakta dhe gjysmë të sakta dhe kanë arritur të krijojnë konfuzion në popullatë.
“Tani do të flas me fakte, pasi ISHM ka mbyllur një kapitull për këtë mbikëqyrje për të ndalur të gjitha spekulimet që po përhapen në opinion: Më datë 14 mars, nga kompania BULMAK 2016, kam marrë një njoftim me e-mail për një incident ku ka pasur plasaritje të një tubi uji teknologjik nga tubuesi i ujit deri te impianti i flotacionit. Në përputhje me kompetencat e mia ligjore, menjëherë kam dhënë urdhër për inspektim të jashtëzakonshëm dhe inspektorët shtetërorë kanë dalë menjëherë në terren”,
- tha Ginovska.
Kompania BULMAK 2016, shtoi ajo, është dënuar me gjobë prej 180.000-200.000 euro për personin juridik dhe 10.000 euro për personin përgjegjës, gjobë e cila është më e madhja në ligjin mjedisor, kompania ka nënshkruar marrëveshje dhe çështja i është dorëzuar Komisionit për Zgjidhje, që është në varësi të Ministrisë së Mjedisit Jetësor dhe Planifikimit Hapësinor. Kompania BULMAK, nga ISHM është ngarkuar me vendim që më 24 mars 2025 të marrë masa për vlerësimin e dëmeve të mundshme në mjedis që do të bëhet nga ekspertë të jashtëm dhe menjëherë pas marrjes së raportit zyrtar do të tregojë nëse ka pasur ndikim në tokë, ujë dhe gjallesave, nëse ka lënë pasoja në mjedis”, tha Ginovska.
Drejtoresha e ISHM-së bëri të ditur se do të marrë të gjitha masat e duhura në përputhje me ligjin dhe do të informojë publikun për hapat e ardhshëm.
‘I mohoj spekulimet se atë ditë inspektorët e ISHM nuk kanë dalë në terren. I hedh poshtë të gjitha akuzat ku thuhej se kam deklaruar se është derdhur vetëm ujë. Një deklaratë e tillë nuk ekziston askund. I mohoj spekulimet se ka ngordhje peshqish në Kriva Rekë, nga data 14.03.2025 e deri më sot nuk është vërejtur kjo, dhe dua që opinioni të jetë i vetëdijshëm se ECOCID nuk vërtetohet me 1 litër ujë të marrë nga 1 vend dhe vetëm me 1 mostër, por me një analizë të plotë dhe gjithëpërfshirëse
- tha Ginovska për mediat.
Ajo tha se me përgjegjësi pohon se në Kriva Rekë nuk ka cianid disa qindra herë mbi nivelin e lejuar, duke shtuar se ky incident mjedisor tregoi dobësitë e sistemit që ka trashëguar, duke premtuar se ky rast do të ketë zgjidhje ligjore, dhe opinioni do të informohet për të gjitha masat e ndërmarra nga inspektorati.