Конференцијата е во организација на Проектот „Транзиција кон ниски емисии и климатски отпорна економија во Западен Балкан и Туркије“ – TRATOLOW, чија цел е да придонесе за ублажување и адаптација на климатските промени и развој кон климатски отпорна економија, како и економија која поттикнува употреба на ефикасни ресурси и ниски емисии на стакленички гасови.
Конференцијата, на која заседаваа високи претставници на министерствата надлежни за животната средина, климатски промени и економија од земјите од Западен Балкан и Tуркије, претставува платформа за отворен дијалог, соработка и координирање на напорите да се адаптира и ублажи климатската криза и да се потврдат стремежите за декарбонизирана иднина и нула загадување.
Во своето излагање излагање, министерката Шукова истакна дека само со правилни инвестиции и соодветна институционална правна и административна инфраструктура, може да се донесат стратешки одлуки за бенефит на сите граѓани и домашната економија.
Таа се осврна и на инвестициската платформа за праведна енергетска транзиција, вредна три милијарди евра, која беше промовирана на COP 28 во Дубаи на крајот на минатата година. Платформата е усогласена со главните стратешки документи усвоени од Владата, вклучително и Национално утврдените придонеси и Стратегијата за развој на енергетиката до 2040 година, особено во однос на постепеното укинување на капацитетите на електраните на јаглен до 2030 година.
Понатаму, министерката Шукова нагласи дека нашата земја е посветена на исполнување на задолженијата од Планот за раст на Западен Балкан, кој подразбира и изработка на Закон за климатска акција, чие усвојување и идна имплементација претставува приоритет на владата на РСМ.
На крај министерката го нагласи и значењето на регионалната соработка и континуираната подршка од Европската Унија преку нејзините Инструменти за предпристапна помош на национално и регионално ниво, кои придонесуваат за полесна транзиција кон почиста енергија, намалени емисии на јаглерод и економија отпорна на климатските промени во земјите на Западен Балкан и Туркије.
