Министерот за животна средина и просторно планирање Изет Меџити, како дел од новата Влада присуствуваше на презентацијата на новиот проект за Парк со ветерници, што ќе биде изграден меѓу трите општини, Карбинци, Штип и Радовиш.
Инвестицијата од компанијата Енерџи Алказар е вредна околу 450 милиони евра, предвидува поставување на 55 турбини на ветер, при што околу 20 отсто од електричната енергија во земјава ќе се обезбедува преку природно производство на електрична енергија.
Покрај енергетската независност, оваа инвестиција ќе отвори 630 нови работни места, ќе обезбеди користење на здрава, обновлива енергија со што ќе се придонесе за почиста животна средина и подобар живот и здравје на граѓаните.
