Në mbledhjen e sotme të Grupit Punues Sektorial për Mjedisin Јетësor dhe Veprimin Klimatik, të kryesuar nga ministri i Mjedisit Jetësor dhe Planifikimit Hapësinor Naser Nuredini, u bisedua për prioritetet dhe reformat sektoriale në këtë fushë që duhet të zbatoheshin në periudhën afatshkurtër dhe afatmesme, duke marrë parasysh strategjitë përkatëse sektoriale, reagimin strategjik, objektikvat dhe treguesit përkatës.
- Maqedonia e Veriut po bën përpjekje të konsiderueshme për të harmonizuar legjislacionin dhe sistemet e saj me legjislacionin dhe politikat e BE-së për mjedisin jetësor dhe klimën – tha Nuredini në fjalimin e tij hyrës, duke theksuar se hapja e negociatave për anëtarësim me BE-në do të intensifikojë procesin e harmonizimit të legjislacionit dhe do të vëjë fokus të ri të zbatimit.
Sipas strategjive sektoriale të MMJPH-së, të cilat janë të harmonizuara me marrëveshjet ndërkombëtare dhe dokumentet strategjike rajonale, në radhë të parë me “Marrëveshjen e Gjelbër” dhe “Agjendën e Gjelbër” për Ballkanin Perëndimor, synimet prioritare për t’u arritur janë: optimizimi i menaxhimit të ujit dhe reduktimi i ndikimit të mbetjeve të ngurta në mjedisin jetësor; Ruajtja, rinovimi dhe menaxhimi i burimeve natyrore dhe promovimi i përdorimit të qëndrueshëm të tyre; Reduktimi i emetimeve të gazeve serrë dhe ndotja e ajrit dhe përmirësimi i rezistencës ndaj ndikimeve të ndryshimeve klimatike dhe Përmirësimi i politikëbërjes dhe zbatimi i ligjeve.
Kostot e vlerësuara të pajtueshmërisë me legjislacionin përkatës të BE-së për të gjithë sektorin mjedisor janë të larta dhe instrumenti i para-anëtarësimit do të luajë një rol të rëndësishëm në sigurimin e mbështetjes financiare së bashku me buxhetin e shtetit, institucionet financiare ndërkombëtare dhe donatorë të tjerë.
Qëllimi i takimit ishte jo vetëm informimi i donatorëve ndërkombëtarë dhe institucioneve donatore për prioritetet sektoriale, por edhe thirrja për përfshirje dhe mbështetje aktive në arritjen e synimeve të përcaktuara.