Zëvendësministrja e Mjedisit Jetësor dhe Planifikimit Hapësinor, Hristina Oxhaklieska, foli në sesionin e nëntë të Takimit të nënshkruesve të Konventës për mbrojtjen dhe përdorimin e rrjedhave ujore ndërkufitare dhe liqeneve ndërkombëtare (Konventa e Ujit), e cila mbahet nga 29 shtatori deri më 1 tetor në Gjenevë. Ngjarja organizohet nga Komisioni Ekonomik i OKB -së për Evropën (UNECE) në bashkëpunim me Qeverinë e Republikës së Estonisë.
Duke theksuar rëndësinë e bashkëpunimit ndërkufitar për ruajtjen e suksesshme dhe përdorimin e qëndrueshëm të burimeve ujore, në një kohë kur skenarët e klimës parashikojnë periudha më të thata dhe më të ngrohta në vitet e ardhshme, zëvendësministrja Oxhaklieska tha:
- Konventa është një mundësi e shkëlqyer për të zgjeruar dhe thelluar bashkëpunimin me fqinjët tanë dhe është një instrument për mbrojtjen e ujërave ndërkufitarë duke parandaluar, kontrolluar dhe zvogëluar ndotjen, por gjithashtu siguron një bazë për përdorimin e qëndrueshëm dhe të duhur të ujërave ndërkufitarë. Bashkëpunimi fokusohet në shkëmbimin e informacionit, pjesëmarrjen në projekte të përbashkëta dhe pajtueshmërinë me kërkesat dhe normat ndërkombëtare, veçanërisht kur bëhet fjalë për ujërat ndërkombëtare.
Sipas Oxhaklieska, vendi ynë tashmë po ndërmerr aktivitete të rëndësishme për mbrojtjen e burimeve ujore, ku janë përfshirë edhe faktorët ndërkombëtarë.
- Në bazë të marrëveshjeve dypalëshe, janë krijuar Komitete të përbashkëta dhe grupe pune ekspertësh për Liqenin e Ohrit dhe Prespës, të cilët koordinojnë aktivitetet ndërkufitare që kanë ndikim në vendet fqinje. Për më tepër, kohë më parë u mbajt takimi inaugurues i tre ministrave të mjedisit të Greqisë, Shqipërisë, Maqedonisë së Veriut dhe përfaqësuesit të nivelit të lartë të Komisionit Evropian për zbatimin e “Marrëveshjes për mbrojtjen dhe zhvillimin e qëndrueshëm të rajonit të Parkut të Prespës”. Rëndësia e bashkëpunimit ndërkufitar gjithashtu njihet qartë në Axhendën 2030 dhe Qëllimin e saj të zhvillimit të qëndrueshëm, i cili kërkon nga vendet që të zbatojnë menaxhimin e integruar të burimeve ujore në të gjitha nivelet, përfshirë përmes bashkëpunimit ndërkufitar të ujërave. Republika e Maqedonisë së Veriut është e përkushtuar në arritjen e Qëllimit 6 për ujë dhe qëllime të tjera të lidhura me ujin nga Axhenda për zhvillim të qëndrueshëm 2030-tha Oxhaklieska, duke shtuar se zhvillimi i menaxhimit ndërkufitar të ujit është një katalizator për zhvillimin ekonomik, integrimit rajonal, bashkëpunimit dhe paqes.