Министерката за животна средина и просторно планирање, Каја Шукова денеска оствари средба со новоименуваниот амбасадор на Република Австрија во земјава, Мартин Памер.
Министерката Шукова му посака на Памер добредојде и успех во извршувањето на должноста и изрази благодарност за поддршката што нашата земја ја добива од Австрија во реформските процеси поврзани со евроинтеграциите, посебно осврнувајќи се на процесот на преговори за Поглавјето 27- Животна средина и климатски промени.
На средбата се дискутираше и за тековните проекти каде Австриската Агенција за животна средина се јавува како имплементациона агенција, а посебен акцент беше ставен на програмите за управување со отпадот, и можностите за учество на австриски компании во нивно реализирање, со оглед на тоа што приватниот сектор може да биде релевантен партнер во клучните промени за одржливост на политиките и стандардите за заштита на животната средина.
Министерката Шукова, ги презентираше плановите на Владата на РСМ за остварување на таргетите утврдени со европската зелена агенда, истакнувајќи дека е потребно да се приклучат сите релевантни сектори во постигнување на позелена иднина.
Амбасадорот Памер изрази подготвеност за унапредување на соработката со МЖСПП и волја за реализирање на заеднички проекти со кои ќе се постигнат европските стандарди за заштита на животна средина и климатските промени.